ایک یادگار سیر (A Walk to Remember) سن 2002ء میں بنائی گئی ایک رومانوی فلم ہے۔ فلم اسی نام کے ایک ناول پر مبنی ہے جو کہ نکولس سپارکس(Nicholas Sparks) نے 1999 میں لکھا تھا۔ فلم کے ہدایتکار  آدم شینک مین(Adam Shankman) ہیں اور مرکزی کردار شَین ویسٹ (Shane West) اور  اد اکارہ و گلوکارہ مَینڈی مُور(Mandy Moore) نے ادا کئے ہیں۔

خلاصہ/کہانی

(فلم کا پورا پلاٹ لکھنے کی بجائے،میں کوشش کروں گا کہ صرف خلاصہ لکھ کر ہی کام چلایا جائے۔)  فلم کے مرکزی کردار  شمالی کیرولائنا کے ایک سکول کے طالبعلم ہیں۔  لینڈن کارٹر(Landon  Carterشین ویسٹ)  بری صحبت کا شکار  لیکن ایک لائق اور نمایاں طالبعلم ہے۔ اپنے دوستوں کے ساتھ آوارہ گردی کرنا اور دوسروں کو تنگ کرنا اس کا مشغلہ ہے۔ اسی طرح کی ایک تفریح کے دوران  انکا ایک ساتھی زخمی ہو جاتا ہے اور لینڈن کو بھی چوٹ لگتی ہے، اسی کی پاداش میں اسے سکول میں غیر نصابی اور صحت مندانہ سرگرمیوں میں نہ چاہتے ہوئے بھی حصہ لینا پڑتا ہے۔ انہی سرگرمیوں میں سے ایک،  سکول میں ہونے والا  سالانہ ڈرامہ ہے جسکے لئے وہ  گرجا گھر کے پادری کی بیٹی جیمی سلیوان(Jamie Sullivan مَینڈی مُور) سے مدد لیتا ہے۔ جیمی ایک سادہ،خوبصورت،  خاموش طبع اور عزائم سے بھرپور لڑکی ہے، جسکی زندگی میں اسکی خواہشات کا بڑا عمل دخل ہے۔ دونوں میں کوئی بات بھی یکساں نہیں ہوتی تاہم جیمی اس کی مدد کیلئے تیار ہو جاتی ہے۔ یوں  دونوں ساتھ وقت گزارتے ہیں۔ کچھ ایسے  واقعات رونما ہوتے ہیں جس سے ان کے درمیان کشیدگی پیدا ہوتی ہے لیکن بعد میں  لینڈن کے دل میں جیمی کیلئے محبت جاگ جاتی ہے ۔ جیمی،  لینڈن سے پہلے دن ہی ایک بات کہتی ہے کہ: “مجھ سے کبھی محبت مت کرنا!”  (کیوں؟ یہ آپ فلم دیکھنے کے بعد ہی جان سکیں گے)۔  دونوں  کے دلوں میں  ایک دوسرے کیلئے جذبات  پیدا ہو جاتے ہیں (یہاں تک تو تقریباً سب ہی فلموں میں ہوتا ہے!)، لیکن قسمت کو کچھ اور ہی منظور ہوتا ہے کیونکہ  اس کے بعد کہانی میں ایک ٹریجک موڑ  آ جاتا ہے، بولے تو ٹوئِسٹ!۔  لینڈن کا امتحان اور جیمی کا یقین کہانی کو آگے بڑھاتا ہے۔

زمرہ جات

رومانوی، ڈرامہ، ناول پر مبنی فلم

ذاتی رائے

فلمستان پر کئے جانے والے تجزیوں میں یہ پہلا تجزیہ  ہے  جو رومانوی فلم پر کیا گیا ہے۔ یہ فلم میری پسندیدہ رومانوی فلموں میں سے ہے اور بہت سادہ سی اور  ”آسان ” فلم ہے۔ فلم کی کہانی زیادہ منفرد تو نہیں لیکن بہت اچھی ہے۔ سب سے بڑھ کر  اس کو دیکھتے ہوئے آپ کو فلم آگے نہیں کرنی پڑتی(اگر آپ کرتے ہیں تو!)،  فلم میں “سین” نہ ہونے کے برابر ہیں۔ میرے “تجربے” کے مطابق  زنانہ فلم بینوں (؟؟ p: ) میں سے اسّی فیصد کو یہ فلم پسند آئے گی۔ مردانہ فلم بینوں سے کبھی پوچھا  تو نہیں لیکن جو  رومانوی یا  مزا حیہ  رومانوی(Romantic Comedy) فلمیں دیکھنے کے شوقین ہیں، وہ ضرور ٹرائی کریں۔

والدین کیلئے

فلم رومانوی ہے لہٰذا بچوں کیلئے والدین کی راہنمائی ضروری ہے۔ اس کے علاوہ فلم کسی بھی “ریٹڈ” کیٹیگری میں نہیں آتی۔

ریٹنگ/اعزازات

IMDb  پر فلم کی ریٹنگ 7٫1/10 ہے۔

مینڈی مُور کو 2002 کے MTV Awards میں Breakthrough Female performance کا اعزاز ملا۔

اس کے علاوہ 2002 کے Teen Choice Awards  میں بھی کامیابی ملی۔

بیرونی روابط

IMDb کا صفحہ

وکیپیڈیا کا صفحہ